一開始搵地點嘅時候已經有approach過the vow, 之後朋友結婚幫佢問場地就再問多次，但係兩次最後都冇揀到，都有少少唔好意思。因為一開始先生希望可以係船上舉行婚禮，覺得會浪漫同特別好多😝所以一開始我地嘅location係船度，但係婚禮前幾日收到船家通知政府會將船當係party room類別計算，只可以限制4人上船，仲要即時生效，當時我真係嚇親，好驚慌失措😱於是就好臨急臨忙搵the vow問佢哋後日有冇位，開頭staff以為我係問緊下星期，但其實我係後日就結婚😭真係好好彩the vow依邊有位，同埋即使我之前好似混吉咗兩次都好，staff嘅態度都仲係好nice🤫 咁我第二日就即刻去睇場，the vow個場係好新淨同靚嘅，場地向海，睇日落嘅話會好靚，而且影完相就可以落沙灘，好方便🏝️

由於the vow係新開，網上資料可能比較少，佢ig上面嘅相我覺得唔太反映到個景嘅全部，不過去到現場就會知係好嘅，唔會有落差😙個景靚之餘，服務真係無得彈，我地之後緊急咁問佢有冇期嘅時候，佢都好體諒我地，話如果係自己遇到咁嘅事真係會好擔心🥺如果政府政策有咩臨時改動過，佢哋都好快手幫我處理，做一啲legal嘅改動🧐

最令我印象深刻嘅係婚禮之後攝影師比咗啲preview相我，我見到其中一張係捕捉我朋友觀禮嘅情景。由於依家個個戴口罩，都需要多少少時間先會認到人🤣我就見到係我堆朋友附近企咗一個女仔，從個女仔嘅眼神我feel到佢係好真誠好開心咁觀禮，我開頭諗來諗去都唔知係邊個，以為係朋友🧐於是我就問返當時係相入面嘅朋友認唔認到個女仔，結果朋友同我講原來係the vow嘅staff，仲話覺得佢好似真係自己朋友結婚咁😚總括而言，the vow嘅場地一流而且staff全部都好helpful，都係因為佢哋先令我可以好開心咁完成婚禮！